“Nordic Conference in Elementary Swimming Teaching” er ráðstevna annaðhvørt ár um grundleggjandi svimjifrálæru, sum nú 10 ferðir hevur verið fyriskipað á skift í ymiskum Norðanlondum, við svimjisambandinum í vertslandinum og “Nordic Education Group” sum samskiparar. Málbólkurin er svimjivenjarar og lærarar sum fáast við grundleggjandi svimjifrálæru og lívbjarging, har innihaldið í ár til dømis var spurningurin um nýtslu av flótiamboðum í svimjiundirvísing, og frálæra til børn við breki. Ráðstevnan vendir sær móti einum altjóða skara, og allir fyrilestrar verða hildnir á enskum.

Í 2008 var ráðstevnan í Selfossi í Íslandi, við Jórun Eið sum umboð fyri Svimjisamband Føroya. Í ár vóru luttakararnir Rúni Gaardbo og Pálin Olsen, sum eru skeiðshaldarar hjá Svimjiskúla Føroya, umframt Jórun Eið, ið sum starvsnevnarlimur í Svimjisambandi Føroya samskipar Svimjiskúla Føroya. Svimjisambandið hevur í 2012 átikið seg at hava hesa ráðstevnu í Føroyum. Ráðstevnan verður hildin í Norðurlandahúsinum í Tórshavn tann 20. til 22. apríl 2012, ætlandi verða omanfyri 100 luttakarar á hesi ráðstevnu.

Svimjiskúli Føroya er samstarv millum Mentamálaráðið og Svimjisamband Føroya, at fáa til vega skeiðstilboð til svimjilærarar og venjarar í føroyskum fólkaskúlum og svimjifeløgum. Í løtuni kann Svimjiskúlin bjóða skeið í vatntilvenjing og svimjigreinunum, umframt at fólk gjøgnum skipanina kunnu fáa lívbjargingarprógv. Ætlanin er seinni at víðka um Svimjiskúlan, við frálæru eisini í venjingarlæru og líknandi, so hvørt sum orka verður til tess.

Les meira á www.svimjiskulin.com og www.neg2012.com

Vegna Svimjisamband Føroya

Rókur í Jákupsstovu

Norðmenn hava nýliga givið út eina undirvísingarætlan til merkjaskipanina, kallað “Veien mot svømmedyktighet”, at brúka í fólkaskúlanum. Talan er um tilfar sum er beinleiðis grundað á lærubókina “Slik lærer du å svømme”, har tey vísa á hvussu ein kann skipa undirvísingina av nýbyrjarum yvir 40 x 30 minuttir, og har tilfarið er laminerað og innbundið sum ‘flip-over’, at kunna brúka beinleiðis í hylinum. Tilfarið kann bíleggjast á www.idrettsbutikken.no, ella við at venda sær til tann føroyska svimjiskúlan.

Tey nýútbúnu eru: Vár Jacobsen, Brynhild F. Jacobsen, Rúni K. Hansen, Dánjal Hestoy, Katarina Lamhauge, Marjun Eysturoy, Mariann Øster, Gunnvá Egholm og Sigurd Lamhauge. Skeiðshaldari var undirritaði Rókur í Jákupsstovu, og lat meg heldur beinanvegin staðfesta, at HS hevur verið fyrimyndarligt í íverksetingini av hesum svimjiskúla.

Sí http://www.svimjiskulin.com/um-svimjiskulan/merkjaskipanin/faldari/

Ella far beinleiðis til faldaran her (pdf-fíla)

Og so havi eg beint nú avgjørt at taka hasa wiki’ina burtur, heilt einfalt tí at eg tími ikki at umsita hana afturat hesari heimasíðu. Ikki at tað er so øgiliga strævið, men tað verður ógvuliga skjótt dupult. Og hendan skipan her hevur forrestin longu wiki-líknandi eginleikar, at kunna halda skil á fleiri útgávum av somu síðu.

Fyribils er her ikki nógv at síggja, annað enn at eg havi fingið skrivað eina síðu um svimjiskúlan, umframt at hava stovnað eina ‘wiki’ á wiki.svimjiskulin.com, at royna at brúka til at snikka saman eina felags handbók um svimjiskúlan.

Næstu dagarnir fara at ganga við at fáa lagt á síðurnar tað tilfar sum longu er skrivað á føroyskum um svimjiskúlan og merkjaskipanina, í sambandi við skeiðini í vár og fjør heyst.